हितोपदेश-सुभाषित-श्लोकाः - 0.6

मूलम्-

विद्या ददाति विनयं विनयाद् याति पात्रताम् ।

पात्रत्वात् धनमाप्नोति धनाद् धर्मं ततः सुखम्॥६॥

पदविभागः-

विद्या ददाति विनयं विनयाद् याति पात्रताम् । पात्रत्वात् धनम् आप्नोति धनाद् धर्मं ततः सुखम्॥६॥

अन्वयः-

विद्या विनयं ददाति। विनयाद् पात्रताम् याति । पात्रत्वात् धनम् आप्नोति। धनाद् धर्मं (आप्नोति) ततः सुखम् (आप्नोति)॥६॥

प्रतिपदार्थः-

विद्या; विनयं = सौजन्यं; ददाति; विनयाद्;  
पात्रताम् = योग्यताम्;  
याति = तत्स्थितिं लभते;  
पात्रत्वात्; धनम्;  
आप्नोति; धनाद्; धर्मं; ततः; सुखम्; (चाप्नोति)॥६॥

तात्पर्यम्-

विद्यैव सर्वसुखसाधनमित्याशयः। विद्यावान् विनयं प्राप्य, तेन पात्रत्वं लभते। पात्रभूतः सज्जनो धनं लभते, धनात् धर्मोपार्जनं शक्यं कर्तुम्। ततः सुखं प्राप्नोति।