मूलम्-
धर्मार्थकाममोक्षाणां यस्यैकोऽपि न विद्यते ।
अजागलस्तनस्येव तस्य जन्म निरर्थकम्॥२६॥
पदविभागः-
धर्म-अर्थ-काम-मोक्षाणां यस्य एकः अपि न विद्यते । अजा-गल-स्तनस्य
इव तस्य जन्म निरर्थकम्॥२६॥
अन्वयः-
यस्य धर्म-अर्थ-काम-मोक्षाणां एकः अपि न विद्यते, तस्य जन्म अजा-गल-स्तनस्य
इव निरर्थकम्॥२६॥
प्रतिपदार्थः-
यस्य = यस्य पुंसः ;
धर्म-अर्थ-काम-मोक्षाणां = धर्मार्थ-काम-मोक्षाख्य-पुरुषार्थ-चतुष्टयस्य
मध्ये ;
एकोऽपि ; पुरुषार्थः = धर्मादिरूपो
;
न विद्यते = (ध्येयत्वेन) न भवति ;
तस्य
= तस्य पुंसः ;
अजागलस्तनस्य इव = अजा-गल-स्थित-स्तन-वत् लम्बमान-चर्म-खडस्य इव ;
जन्म = जननं ;
निरर्थकं = निष्फलमेव ;
तात्पर्यम्-
यस्य पुरुषस्य पुरुषार्थ-चतुष्टयस्य मध्ये एकः अपि पुरुषार्थः
धर्मो अर्थो कामो मोक्षो वा न विद्यते, तस्य धर्मादीनसेवमानस्य पुंसः दुग्धादि-रहित-बर्कर-गलचर्म-खण्डमिव
वृथैव जन्म इत्याशयः ॥२६॥
No comments:
Post a Comment