मूलम्-
पूर्वजन्मकृतं कर्म तद् दैवमिति कथ्यते ।
तस्मात् पुरुषकारेण यत्नं कुर्यादतन्द्रितः॥३३॥
पदविभागः-
पूर्व-जन्म-कृतं कर्म तद् दैवम् इति कथ्यते । तस्मात् पुरुषकारेण
यत्नं कुर्याद् अतन्द्रितः॥३३॥
अन्वयः-
पूर्व-जन्म-कृतं कर्म तद् दैवम् इति कथ्यते । तस्मात् पुरुषकारेण
अतन्द्रितः यत्नं कुर्याद् ॥३३॥
प्रतिपदार्थः-
पूर्वजन्मनि = गते जन्मकाले ;
कृतं यत्कर्म = आचरितानि कार्याणि ;
तत् = तदेव ;
दैवमिति कथ्यते = ‘दैवपदवाच्यम्, इतोऽन्यद्दैवं नाम किञ्चिदपि नास्ति ;
तस्मात् = पुरुषकारेण विना दैवस्य सिद्धेरभावात् ;
पुरुषकारेण = पुरुषार्थमास्थाय, प्रयत्नं कृत्वा ;
अतन्द्रितः = आलस्यवर्जितः,
सावधानः सन् ;
पुमान् = पुरुषः, मनुष्यः ;
यत्नं कुर्यात् = उद्यमं कुर्यात्॥३३॥
तात्पर्यम्-
गते जन्मनि यद्यदाचरितं कर्म वर्तते, तदेव अस्मिन् जन्मनि भाग्यरूपेण
परिणमति। अतः (पूर्वकाले वा भवतु) प्रयत्नेनैव भाग्यस्यापि कल्पितत्वात्, सावधानो भूत्वा प्रयत्नः अवश्यं करणीयः।
No comments:
Post a Comment